مُراجعة فيلم شازام:
فيلم عالم دي سي السابع لشازام ⚡ الفيلم الأول في تاريخ الشخصية
المهم
ببساطة فيلم شازام فيلم كوميدي عائلي جدآ و فيه روح عظيمة و انت بتتفرج عليه، اسلوب الفيلم مختلف عن اي حاجة في الديسيو او في أفلام الكوميكس عموماً، و دا اللي لازم تاخده في الإعتبار قبل مشاهدة الفيلم لأن المقارنات هتخليك تصنف الفيلم في نوع هو مش عليه.
مميزات الفيلم :
- تجسيد زاكاري ليفاي العظيم للدور، بجد مفيش حد شاف الفيلم إلا و اعترف بإن زاكاري كان مولود للدور، و دا لإن زاكاري شخصيته مماثلة لشخصية شازام تماماً وقدر يقنعك بأقل مجهود ان اللي في جسم شازام دا طفل عنده ١٥ سنة
- الكوميديا عموماً كانت ذكية و مستخدمة صح في أغلب المشاهد ممكن في كام لقطة في الأخر كان فيهم نكت مش قوية اوي لكن عموماً الفيلم في كوميديا لطيفة جدا في كل مشهد فيه، و اللي أغلبهم بيجي من شخصية فريدي اللي كانت بتعكس مواقف شازام لنكت او مواقف كوميدية حلوة.
- أداء باقي الكاست كله مكانش فيه اي مشكلة بل اداء جاك ديلان في دور فريدي و اداء مارك سترونج في دور دكتور سيفانا كانوا الأفضل بعد تجسيد زاكاري ليفاي لشازام.
- و اخر نقطة إيجابية و يمكن أهمهم هي القصة و تمركزها على فكرة العيلة و معناها الحقيقي، بيلي و سيفانا الأتنين بيتشاركوا في نقط زي الإهمال الأسري زي ما اي بطل بيتشارك مع عدوه في حاجة، لكن شخصية بيلي كانت بتطور بشكل فيه رمزية في أغلب مشاهد الفيلم، مشاهد بتتكرر و مع كل مرة بيبان تطور الشخصية ونضجها .. و ده كان سبب اختيار دكتور سيفانا كأول فيلان لشازام علشان يدي مساحة لشازام يكتشف قدراته و ينضج اكتر.
السلبيات :
السلبيات اللي حسيت بيها في اول مرة شوفت فيها الفيلم كان تتابع مشاهد الأكشن اللي كان متعب حبتين و سريع، بعد تاني مرة حسيت انه كان احسن و مناسب للي الفيلم عايزه لكن برضه كان محتاج مشهد درامي زياده ما بين اول و تاني مواجهة
و حاجة تانية هي الموسيقى، ساعات كانت بتبقى عظيمة و لايقة جدا على المشاهد و ساعات كانت بتبقى مزعجة حبتين.
..
نقط جانبية :
الفيلم زي ما قولت مختلف عن اي فيلم تاني متحاولش تقارنه بمان اوف ستيل او وندر ومان مثلاً لأنه حاجة تانية
كوميديا الفيلم و الجو بتاعه فكرتني بفيلم كوميدي عظيم زي
Shaun of the dead
خصوصاً استخدام اغنية لكوينز في مشهد كان الأعظم في الفيلم بالنسبة لي❤️
CorpsMeter : 8.5/10
إرسال تعليق