لماذا شخصيات دي سي هُم الأعظم!؟

باتمان الأعظم؟!

بقالنا سنين بنشوف فان وارز في الكومنتس أو جروبات أو أي حتة عاماً على أن مين الأعظم، و هل بيل الأعظم؟ ولا أفليك الأعظم؟ ولا كيتون الأعظم؟ ولا كونري الأعظم؟

في الحقيقة كلهم عظمة بطريقتهم بس أكيد كل واحد ليه جوانب ضعيفة، ممكن تكون أنت أو غيرك بتفضل نسخة عن التانية و دة شئ طبيعي لكن مش معنى دة أن هي الـsuperior و لازم ناخدها كأساس في أي حاجة و إختلاف الباقي يعتبر حاجة وحشة!

تعالوا كدة نتكلم في كل نسخة شوية:

نبدأ بـكريستان بيل الأشهر و اللي غالباً الجدال بيبقى عليها، ليه دايماً بنقول أنه الأعظم؟

في الحقيقة مفيش حد قدر يعمل Arc عظيم للشخصية بالشكل دة في أي فيلم Live Action غير نولان و نسخته، و دة من أول الصراع الداخلي لبروس في أنه عايز ينتقم لموت والديه و بعد كدة عرف أن في طريقة أفضل لتطويع كل الغضب اللي جواه دة و يحارب الجريمة في مدينة جوثام بشكل صح، و بعد كدة بداية صراع الصح و الخطأ بين الچوكر و باتمان و الـPoint كلها من إثبات أن رأي الچوكر في الناس و العالم غلط و أن أهل جوثام لسة بيؤمنوا بالخير و أن باتمان مستعد يبقى المجرم عشان صورة هارڤي دينت تفضل بريئة زي ما هي لأهل جوثام لأن كل واحد يستحق يتكافئ على إيمانه، و بعد كدة رجوع باتمان تاني لشوارع جوثام مرة تانية و لكن بتهديد أخطر و أقوى و فلسفة كسر البطل نفسياً و جسدياً و أنه بيحاول الرجوع تاني... إلخ

دة اللي بيخلي نسخة بيل عظيمة قوة الصراع و الكتابة للشخصية.

نيجي للجوانب الضعيفة:

رؤية نولان الواقعية و الـgrounded للشخصية خلت طريقة الـfighting للنسخة دي من باتمان مع أي حد كأنه في قتال شوارع مش شخصية تعرف 127 نوع من فنون القتال، هل باتمان في الكوميكس ميقدرش يتعامل أو يتفادى كلبين بيهجموا عليه بسهولة؟ أكيد طبعاً يقدر يعمل دة، كانت حاجة مزعجة للشخصية و لكن كمنطق في الفيلم و العالم فا هو شئ عادي جداً.

صوت باتمان بيل حرفياً كان دايماً مبحوح و عمال يهاتي في أحباله الصوتية طول الثلاثية، يعني نولان كان أسهله أنه يعمل الصوت ديچيتال بدل البهدلة دي، لكن هو صمم على دة.

في Batman Begins مدينة جوثام كان ليها طابع Gothic و ملامح كلها بتقولك أنا أخطر مدينة في العالم و كلها جريمة، و لكن مع الوقت تقريباً نسوا يعملوا دة أو طنشوا، و مدينة جوثام بقت Generic جداً متفرقش حاجة عن نيويورك.

في Batman Begins المفروض أن شخصية باتمان بتتكون على مبدأ عدم القتل و لكن في الحقيقة باتمان يعتبر قتل! أيوة قتل رأس الغول و طبعاً هتقول أنه قلب عليه مبدأ اللي هو "You never learned to mind your own surroundings!" بس دة مشهد في منتهى الهبل باتمان حرفياً سابه في القطر و هو عارف كويس أنه هينفجر يعني عارف أنه سايبه لموته! و كان يقدر يقبض عليه و يسلمه لشرطه جوثام، هتقول أنه خطر على شرطة جوثام؟ عادي يقدر يحبسه في أي حتة تانية تبعه.

نيجي لأفليك ليه بنقول على أفليك الأعظم؟

في الحقيقة أفليك كتجسيد للشخصية إذا كان باتمان أو بروس فا هو الأعظم لحد الوقت مقارنة بالكوميكس، و كمان مقارنة بالكوميكس كلنا عارفين أن دي نسخة The Dark Knight بتاعة فرانك ميلر، و حرفياً أعظم بدلة Accurate أتعملت في الأفلام لباتمان هي نسخة أفليك كأنها طلعت من صفح الكوميكس للحياة.

مشاهد الـFighting كانت قوية جداً و مناسبة للشخصية جداً، باتمان اللي بيخش في الحيطان و ياخد سكينة في كتفه و يمسك Machine Gun بأيد واحدة و مُجرم في أيدو التانية، ويقف لكيان زي سوبرمان بالـArmor Suit و يخطط أزاي أنه يقدر يموته بالكريبتونايت هو دة فعلاً باتمان الكوميكس.

نيجي للجوانب الضعيفة:

القصة، أحنا حرفياً مشوفناش حاجة من تاريخ النسخة دي إذا كان في ماضي الـ20 سنة اللي فاتوا أو الحاضر كفيلم سولو و هو كبير فا دة مش قادر يضيف قيمة للـArc بتاعة في أي حاجة، مشوفناش غير تصادم مع سوبرمان لأول مرة على الشاشة و كان تصادم حلو، و شوية كلام مع ألفريد في تلميح عن موت روبن، و أن مش كل الناس بتفضل كويسة على حالها.

القتل، مبررات القتل كانت أن بسبب أن سوبرمان ظهر مرة واحدة في العالم، و معركته مع چيرنال زود أتسببت في ضرر كبير نتج عنه ضحايا، و أن موت روبن كان مأثر عليه و حاسس بالندم أنه معرفش يعمله حاجة و بقى في نوع من الغضب جواه تجاه المجرمين و مفيش تهاون و بقى بيحط علامته عليهم عشان لما يدخلوا السجن يتقتلوا، في الحقيقة كل المبرارات دي مش منطقية كفاية أنها تخلي باتمان يكسر كود القتل بتاعه، بروس لما كان عايز يبقى باتمان كان عايز ينقذ الإنسانية في المقام الأول و مستحيل من سابع المستحيلات أنه يكسر الكود اللي هو بدأ فيه أصلاً بسبب أن أمه و أبوه أتقتلوا أدام عينه و جاله Trauma من القتل و من المسدس، باتمان عُمره ما هيعمل كدة، و مشهد مارثا الشهير أنه بيبدأ يستوعب أنه كدة مش هيبقى فيه فرق بينه و بين المجرمين و أن سوبرمان مش مجرد فضائي و ليه أب و أم المشهد دة حرفياً نكتة لأنه Already قتل ناس و أتسبب في قتل ناس أكيد ليها حد بيحبها ليها أولاد أو زوجة أو أم و أب، أي كان هو مجرم أو مُغتصب أو بيتاجر في البشر باتمان بيسجنهم و بيديهم فرصة للـRedemption، غير كدة منين أنت مضايق أن سوبرمان و زود أتسببوا في ضحايا و أنت أصلاً عمال بتقتل في بشر!!

لما تبدأ تلعب في أُسس الشخصية الموضوع بيبدأ يبقى مُضلل و فوضوي جداً و تبدأ تطلع حجج زي باتمان أول ظهور ليه كان ماشي بمسدس و بيقتل في المجرمين و بيرميهم من على السطوح و بلا بلا... و لكن دي مش حجة مُقنعة بتاتاً، الكُتاب غيروا جوهر الشخصية كلياً و فلسفته لعدم القتل، و دي هي نسخة باتمان الرئيسية من وقتها، وجود نسخ تانية بتقتل دي مجرد حاجات جانبية و كلها Elseworld لمجرد الفكرة في حد ذاتها لكن مش منهج رئيسي ليها.

نيجي لكيتون ليه بنقول عليه الأعظم؟

شخصية كيتون و عالمها كان واخد طابع كوميك بوكي جداً من حيث كل حاجة، إذا كان السرد و البدل أو الشخصيات المساعدة و الڤيلينز، مدينة جوثام ذات نفسها و الطابع الـGothic اللي غالب عليها دايماً و كل دة كان ليه تأثير كبير على Batman The Animated Series و حتى ألعاب Arkham.

صوت كيتون هو الأعظم على الإطلاق في الأفلام و كلنا عارفين اللاين الشهير بتاع "I'm Batman"، شايفك يا اللي هتقول أفليك أحب أقولك أن أفليك كل صوته كان Digital manipulation على عكس كيتون اللي كان بيأديه بنفسه.

باتمان بيقتل، باتمان هنا معندوش نزعة الحفاظ على الحياة و بيقتل على طول طبعاً هتقول طب و دة عظيم في أيه بعد الكلام الكبير أوي اللي فوق على أفليك دة، هقولك أن فكرة وجود باتمان بيقتل الڤيلينز بتوعه زي أنه مثلاً قتل الچوكر و البينجوين و أتباعهم من المجرمين فا هو دة التطبيق الـDefinitive ليها، و لكن وجود باتمان بيقتل مجرمين مجرد أتباع للڤيلينز زي أفليك و سايب ناس زي الچوكر و باقي روستر الڤيلينز عادي كدة فا دة مش منطقي خالص دة ضحك.

-في ملحوظة بس عايز أقولها على أفلام Tim Burton هي للناس اللي مشافتش أفلامه و بتقول عليها وحشة لمجرد إن تاريخ إنتاجها قديم! فا حابب أقولهم أنك تتكلم على فيلم من غير ما تشوفه دة قمة الجهل و أنت شخص جاهل، Tim Burton قدم أعظم أسلوب ڤيچوالز للشخصية لحد يومنا دة، و هسيب لينك لبوست في الكومنتس كنت عامله من فترة بيوضح جزء من جمالها.

نيجي للجوانب الضعيفة:

تجسيد كيتون لبروس هو الأبشع على الإطلاق.
بحكم إن الإنتاج قديم فا مشاهد الـFighting بالنسبة للشخصية تعتبر كانت هبلة شوية.

نيجي لڤال كاليمار، أيه؟ مين كاليمار دة يا بيه؟

معلش بقى مجتش على الراجل دة يعني، المهم شخصية باتمان في Batman Forever بصراحة مش واخدة حقها، تخيل معايا كدة عزيزي القارئ باتمان بيعاني من صراع نفسي أنه معتش قادر يفهم هو بروس ولا باتمان، في نفس الوقت بيحاول يكون مُعلم كويس لروبن، و كمان بيحارب مُختلين نفسيين زي Two Face و The Riddler، كمان ذكريات موت أبوه و أمه بتطارده دايماً إذا كان في أحلامه أو واقعه، مش كدة و بس بيتم الهجوم عليه في قلب بيته و البات كيڤ بتاعه، كاليمار كان بروس عظيم.

نيجي للجوانب الضعيفة:

تجسيد كاليمار لباتمان كان متوسط، كان بيعاني نوعاً ما في الحوارات.

نيجي لكونري ليه بنقول عليه الأعظم؟

كيڤن كونري بالنسبة لناس كتير هو أحسن باتمان يا ترى هل ده إنحياز للطفولة و الـNostaliga؟ ولا هو فعلاً أفضل باتمان؟ ذكرياتنا مع كونري هتلاقيها موجودة في مِئات الحلقات لكارتون باتمان، و كارتون Justice League ذكرياتنا أمتدت معاه في الأفلام الأنيميشن و حتى في سلسلة ألعاب أركام، و أخيراً ظهوره الشرفي كباتمان في Crisis on Infinite Earth، كيڤن كونري بقاله أكتر من 20 سنة بيعمل الشخصية و هو الـDefentive Version لشخصية باتمان كفاية بس تغيير نبرة صوته ما بين بروس واين و باتمان.

نيجي للجوانب الضعيفة:

بصراحة صعب تطلع حاجة ضعيفة في نسخ كونري كلها، يمكن أنه نوعاً ما مُتكاسل عن أداء الدور في الفترة الأخيرة مش أكتر.

أنا قررت أكتب الموضوع دة عشان حابب أقول أن لازم نستمتع بكل النسخ و نبقى عارفين كويس هي عظيمة في أيه و بتعاني من أيه بكل شفافية، و أن الشخصية مش ملك لممثل أو مخرج معين، و أن كل الممثلين و المخرجين يستحقوا فرصتهم في أنهم يحطوا أيدهم عليها و يقدموا أفكارهم و إبداعهم للجمهور بدون هجوم غير مفهوم و عمياني لمجرد تمسكك المُستميت بنسخة معينة مع أنك كفان للشخصية المفروض تفرح بالتنوع و تستمتع بكل Take بيتعمل ليها، و تحترم كل نسخة أتعملت و تدعم الرؤية الجديدة دايماً.

لو قرأت كل دة فا حابب أشكرك على وقتك، و لو كنت مستني حاجة عن چورچ كلوني فا أسف أنا مشوفتش الفيلم بتاعة أصلاً :"

كتابة: Mohammed Zano