بيردز اوف براي الفيلم التامن في العالم السينمائي لدي سي و اللي في تساؤلات كتير عن اذا كان لسا موجود او افلامه متصلة ببعض او لا، لكن الفيلم ده بيأكد اتصاله بشكل قوي بفيلم سوسايد سكواد عن طريق تلميحات كتير و حتى إستعمال لقطات من الفيلم نفسه.
الفيلم بيبتدي بهارلي كوين اللي انفصلت نهائياً عن الچوكر و بتدور على استقلاليتها و في نفس الوقت بتكتشف ان الحصانة اللي كانت مستفيدة بيها من حبها للچوكر *زي انها تقدر تأذي اي حد و مش هيعملها حاجة خوفاً من الچوكر* خلاص راحت و ده معناه ان كل اللي كانوا عايزين ينتقموا منها جاتلهم الفرصة علشان يعملوا كدا و على رأسهم رومان سايونيس.
الفيلم برضه كفيلم من بطولة هارلي كشخصية عادةً مش جادة يخليه ليه تمبلت معين و نوع سرد و قصة معينين. فبالتالي مش ده الفيلم اللي تnitpick فيه و تسأل اسئلة كتير، فبالتالي ليه تقييم مختلف عن أفلام تانية. يعني هدف الفيلم أنه يكون ممتع و يكون تحديث لنوع أفلام الكوميكس بقصة حلوة مفهاش بلوت هولز و تمثيل كويس مش أكتر .
هتكلم عن شخصيات الفيلم و تقديمهم بشكل مختصر قبل ما اقول مميزات و عيوب الفيلم :
هارلي كوين :
الشخصية اللي بتروي الفيلم كله من منظورها و بتعلق عليه بشكل ظريف جداً مع 4th wall break لطيف و مش مبالغ فيه فبالتالي مميز و مش شبه ديدبول زي مالناس فاكرة.
و مفيش حاجة جديدة تتقال غير ان مارجو روبي خدت وقت اطول تثبت فيه قوة تجسيدها للشخصية و اللي المرة دي أعلى بكتير فعلاً من Suicide Squad لأن الشخصية مكتوبة بشكل أحسن.
بلاك كناري:
چورنيه جسدت الشخصية بشكل عظيم و استمتعت جدا بكل مشاهد الشخصية
هانتريس:
مظهرتش كتير و دورها على عكس ما توقعت كان جانبي جدآ لكن كذلك ماري عاملة أداء كويس و على قد ظهورها القليل لكن كانت شخصية لطيفة برضه
رينيه مونتويا:
زي ما تم وصفها بشكل ساخر في الفيلم هي شخصية المحققة التقليدية في كل الأفلام تقريباً لكن بما انها في فيلم ساخر حبتين فكانت شخصية حلوة برضه
كاساندرا كاين:
اللي المفترض انها تبقى باتجيرل بعد كدا، يعني كان مقصود تبقى شخصية مزعجة حبتين لأن قصة الفيلم بتتركز عليها و على تصرفاتها.
ڤيكتور زاز :
على عكس كل الشخصيات المساعدة لأي ڤيلان، ڤيكتور كان ليه أهمية و دوره اتقدم بشكل قوي.
نيجي لأخر و أهم شخصية تقريباً، بلاك ماسك:
إيون ماكريجور تمثيله كان عظييم جداً للدور و ده مفيش حد شاف الفيلم هيختلف عليه كل مشهد ليه كان ممتع بسبب أداءه. بالنسبة للشخصية نفسها انا متفهم كونها شخصية ملهاش أبعاد كتير و ملهاش دوافع عميقة فتتحس نمطية شوية لكن ده مفهوم لأن فيلم زي بيردز اوف براي مش محتاج ڤيلان غير كدا و اداء إيون ميحسسكش بالعيوب دي إطلاقاً.
المميزات :
- الأغاني في الفيلم حلوة جداً، الفيلم يتحس ميوزيكال شوية لكن ده مخلية مميز و ممتع جداً، كل مشهد أكشن بيبدء كنت بتوقع معاه أغنية جامدة
- زي ما ذكرنا الأكشن، ف الفايتس في الفيلم كلها متقنة و ممتعة جداً
- تجسيد الشخصيات و اداء الممثلين زي ما وضحت كان حلو جدا و عامل كبير في الفيلم.
- أخر حاجة و هي رتم الفيلم، كان تقريباً مثالي بالنسبة لي الفيلم بيبني للشخصيات كلها في الأول و يقرب خطوطهم من بعض براحة و في نفس الوقت كل شخصية خط أحداثها متسارع لوحده لحد ما بتيجي نقطة في الفيلم اللي بتمهد لتجميعهم كلهم أخيراً دي تقريباً كانت أعظم نقطة في الفيلم و خليتني احس بڤايب قوي.
العيوب:
- زي ما قولت شخصية بلاك ماسك مكانش أعظم ڤيلان يعني لكن شرحت ليه انا متفهم ده
- فيه لقطات كنت بقف عندها و احس انهم بيحاولوا يحشروا حتة فيمينزم و ده كان بيبقى مزعج شوية لكن مكانوش كتير
- الشخصيات كانت محتاجة وقت أكتر علشان الكيمستري بينهم تطور بشكل منطقي أكتر خصوصاً أن الفيلم مكانش وقته طويل
..
CorpsMeter :
8.5/10
إرسال تعليق